ഹസാര്‍ഡ്‌ ലൈറ്റും മദാമ്മയും .....എന്റമ്മോ !!!

ഇന്ന് വൈകിട്ട് ഉണ്ടായ ഒരു കുഞ്ഞു സംഭവം ..കുഞ്ഞു സംഭവം എന്ന് പറഞ്ഞെകിലും ഇപ്പഴും ചങ്കിടിക്കുവാ ....!!ഇന്ന് വൈകിട്ട് അഞ്ച് മണിയോടെ ദുബായ് മറീനയിലെ ഓഫീസില്‍ നിന്നും വണ്ടിയുമെടുത്ത്‌ കരാമയിലേക്ക് പുറപ്പെട്ടതാണ് !! റേഡിയോ വെച്ചപ്പോ ഹിറ്റ്‌ എഫ്‌ എമ്മില്‍ സിന്ധുവിന്റെ ചോക്ലാത്തി !! (ഹിറ്റ്‌ എഫ്‌ എമ്മിലെ അവതാരക തരുണികളില്‍ നൈല അല്ലാതെ ആരെയും എനിക്ക് പൊതുവേ ഇഷ്ടമല്ല ..മായയെ സഹിക്കാനെ പാടില്ല!! പക്ഷെ കാലത്ത് ബിഗ്‌ ബ്രെയ്ക്ക്‌ ഫാസ്റ്റ്‌ കള്ബ്ബില്‍ നൈലയെ കേട്ട് കൊണ്ട് വണ്ടി ഓടിക്കുന്നത് ഒരു ENERGIZING അനുഭവമാണ് !!)അങ്ങനെ സിന്ധുവിനെ ഒഴിവാക്കാനായി നമ്മുടെ സ്വന്തം റേഡിയോ സ്റ്റേഷന്‍ ആയ FM MODULATOR തപ്പിയെടുത്തു. അപ്പോഴേക്കും വണ്ടി മറീന പാലത്തില്‍ കയറിയിരുന്നു .. ....മുന്‍പില്‍ ഒരു വെളുത്ത BMW കാര്‍ അലസ ഗമനം നടത്തുന്നു ..ഹസാര്‍ഡ്‌ ലൈറ്റ് രണ്ടും മിന്നുന്നുണ്ട് ( ഗള്‍ഫുകാരായ മലയാളികളുടെ ഒരു വിശ്വാസം ഈ ഹസാര്‍ഡ്‌ ലൈറ്റ് എന്ന് പറയുന്ന സാധനം വണ്ടി റോഡിനു നടുക്ക് ഇട്ടിട്ടു കടയില്‍ കയറി സാധനം വാങ്ങാനുള്ള ലൈസന്‍സ് ആണെന്നാ..!!)പക്ഷെ വണ്ടി പാര്‍ക്ക് ചെയ്തിരിക്കുമ്പോള്‍ മാത്രം ഉപയോഗിക്കേണ്ട ഹസാര്‍ഡ്‌ ലൈറ്റ് ഇങ്ങനെ ഓടിക്കൊണ്ടിരിക്കുന്ന വണ്ടിക്കു ഇടുന്നത്അപകടകരമാണ് ... വണ്ടി ഓടിക്കുന്നവര്‍ക്കും അടുത്ത് കൂടി പോകുന്ന മറ്റു വണ്ടികള്‍ക്കും.. കാരണം .ഇടത്തോട്ടോ വലത്തോട്ട് തിരിയുംപോഴോ ലയ്ന്‍ ചേഞ്ച്‌ ചെയ്യുമ്പോഴോ മറ്റുള്ളവര്‍ അറിയില്ല , രണ്ടു indicator സിഗ്നലുകളും ഇങ്ങനെ കത്തി അണഞ്ഞു കൊണ്ടിരിക്കുന്നതിനാല്‍..ഇത് കണ്ടതോടെ എന്നിലെ മലയാളി സട കുടഞ്ഞെഴുന്നേറ്റു ...നമുക്ക് പ്രതികരിക്കാതിരിക്കാന്‍ ആവില്ലാലോ !!മിക്കവാറും ആ വണ്ടിക്കാരന്‍ എവിടെ എങ്കിലും പാര്‍ക്ക് ചെയ്തിട്ട് വണ്ടി എടുത്തപ്പോ ഹസാര്‍ഡ്‌ ലൈറ്റ് ഓഫ്‌ ചെയ്യാന്‍ മറന്നു പോയതാകാനാണ് വഴി ..പാലം കഴിഞ്ഞുള്ള സിഗ്നലില്‍ വണ്ടി നിര്‍ത്തി വീണ്ടും എടുത്തപ്പോഴും മുന്നിലെ വണ്ടിയിലെ ഹസാര്‍ഡ്‌ മിന്നിക്കൊണ്ടേ ഇരുന്നു... എനിക്ക് പ്രതികരിക്കാതിരിക്കാന്‍ വയ്യെന്നായി..തൊട്ടടുത്ത അല്‍ സുഫോഹ് സിഗ്നലില്‍ ആ വണ്ടി നിര്‍ത്തിയപ്പോള്‍ ഇടതു വശത്ത് തന്നെ ഞാനും കൊണ്ട് വണ്ടി നിര്‍ത്തി...ആ വണ്ടിയുടെ അകത്തു ആരാണെന്ന് ടിന്റെട് വിണ്ടോവിലൂടെ വ്യക്തമല്ല .ഞാനൊന്നു ഹോണ്‍ അടിച്ചു...അനക്കമില്ല...ഒന്ന് കൂടി ഹോര്‍ണടിച്ചു .ഇപ്പോള്‍ വണ്ടിയുടെ സൈഡ് ഗ്ലാസ്‌ താഴ്ന്നു..ഡ്രൈവിംഗ് സീറ്റില്‍ മുട്ടന്‍ ഒരു മദാമ്മ .. അടുത്ത് ഒരു എലുമ്പന്‍ സായിപ്പും ( ലളിത ശ്രീയും കൃഷ്ണന്‍ കുട്ടി നായരും പോലെ !!)ഞാനും എന്റെ വണ്ടിയുടെ വിന്‍ഡോ ഗ്ലാസ്‌ താഴ്ത്തി ..മദാമ്മ സണ്‍ ഗ്ലാസ്‌ മാറ്റി എന്റെ നേര്‍ക്ക്‌ പുരികം ഉയര്‍ത്തി ..(ദുബായില്‍ ഒരു വണ്ടി മറ്റൊരു വണ്ടിയുടെ തന്തക്കു വിളിക്കുന്നതിനു പകരമായാണ് ഹോണ്‍ മുഴക്കുന്നത് !! ഇവിടെ റോഡുകളില്‍ നമ്മുടെ നാട്ടിലെ പോലെ വണ്ടികള്‍ തുരു തുരാ ഹോണ്‍ അടിക്കാറില്ല, അതിന്റെ ആവശ്യവും ഇല്ല... മുന്‍പിലുള്ള വണ്ടി സിഗ്നല്‍ തരാതെ ലൈന്‍ ചേഞ്ച്‌ ചെയ്യുമ്പോഴോ മറ്റെന്തെകിലും പിതാവില്ലാത്തരം കാണിക്കുംപോഴോ നമ്മുടെ പിന്നിലുള്ള വണ്ടി പ്രതിഷേധ സൂചകമായി ഹോണ്‍ അടിയ്ക്കുക പതിവാണ് !!)ഞാന്‍ മദാമ്മയോടു " ഹസാര്‍ഡ്‌ ലൈറ്റ് , ഹസാര്‍ഡ്‌ ലൈറ്റ്" എന്ന് വിളിച്ചു പറഞ്ഞു ..റോഡിലെ ഇരമ്പവും വണ്ടിയിലെ പാട്ടും കാരണം ഞാന്‍ പറഞ്ഞത് മദാമ്മ കേട്ടില്ല ( അതോ എന്റെ അത്രയും സ്റ്റാന്‍ഡേര്‍ഡ് ഇല്ലാത്തതു കൊണ്ട് മദാമ്മക്ക്‌ എന്റെ ഇംഗ്ലീഷ് മനസ്സിലാവഞ്ഞതോ..!!)എന്തായാലും രണ്ടു മൂന്ന് തവണ പറഞ്ഞിട്ടും മദാമ്മക്കും സായിപ്പിനും കാര്യം മനസ്സിലാവുന്നില്ല..ഞാന്‍ അറ്റ കൈക്ക് വിശ്വ ഭാഷ ഉപയോഗിക്കാന്‍ തീരുമാനിച്ചു.രണ്ടു കയ്യും ഉയര്‍ത്തി ലൈറ്റ് കത്തുകയും അണയുകയും ചെയ്യുന്നത് പോലെ ആംഗ്യം കാണിച്ചു..ഇത് കണ്ടതും മദാമ്മ സായിപ്പിനോട്‌ എന്തോ പറയുകയും എന്റെ ആംഗ്യം ചൂണ്ടി കാണിക്കുകയും ചെയ്തു.."ഹൊ ..രക്ഷപ്പെട്ടു ..അവര്‍ക്ക് കാര്യം മനസ്സിലാവുന്നുണ്ട് " എന്ന് കരുതി ഞാന്‍ പൂര്‍വ്വാധികം ശക്തിയോടെ വീണ്ടും ആംഗ്യം കാണിച്ചു...ഇത് കണ്ടതും സായിപ്പും മദാമ്മയും ഉറക്കെ എന്റെ നേരെ പച്ച തെറി വിളി തുടങ്ങി ..സ്ഥിര പരിചിതമായ ചില ഇംഗ്ലീഷ് തെറികളെ എനിക്ക് മനസ്സിലായുള്ളൂ ...പക്ഷെ അവരുടെ മുഖ ഭാവത്തില്‍ നിന്നും എനിക്ക് പരിചയമുള്ള തെറികളെക്കാള്‍ മുട്ടനാണ്‌ പരിചയമില്ലാത്ത തെറികള്‍ എന്ന് മനസ്സിലായി .ഞാന്‍ പെട്ടെന്ന് സൈഡ് ഗ്ലാസ്സ്‌ കയറ്റി ഇട്ടു...എന്റെ ഭാഗ്യത്തിന് അപ്പോഴേക്കും സിഗ്നലില്‍ പച്ച തെളിഞ്ഞു...ഞാന്‍ വണ്ടി എടുത്തു മാക്സിമം സ്പീഡില്‍ കത്തിച്ചു വിട്ടു മീഡിയ സിറ്റിക്കുള്ളിലേക്ക് കയറി രക്ഷപ്പെട്ടു !!ഒന്ന് സമാധാനം ആയപ്പോ ഞാന്‍ ചിന്തിച്ചു... ഈ ഉപകാരം ചെയ്യാന്‍ പോയ എന്നെ എന്തിനാവും മദാമ്മ തെറിവിളിച്ചത്‌... ഒരു പിടിയും കിട്ടിയില്ല... അടുത്ത സിഗ്നലില്‍ വണ്ടി നിര്‍ത്തിയപ്പോള്‍ അതേ ആംഗ്യം ( രണ്ടു കൈ കൊണ്ട് ലൈറ്റ് കത്തി അണയുന്നത് ) ഒന്ന് കൂടി സ്വയം കാണിച്ചു നോക്കി....എന്റമ്മോ... ഇത് തന്നെ അല്ലെ വണ്ടിയുടെ പോ.. പോ.. അടിക്കുന്ന ആംഗ്യവും ?? !!!അയ്യേ !!മദാമ്മ എന്നെ തെറ്റിദ്ധരിച്ചിരിക്കുന്നു.... ഞാന്‍ കാണിച്ച ആംഗ്യം അശ്ലീല ആംഗ്യം ആയാണ് അവര്‍ കരുതി ഇരിക്കുന്നത്...ഇനി എന്തൊക്കെ സംഭവിക്കാന്‍ പോകുന്നോ എന്തോ ...?!!ആ മദാമ്മ വണ്ടിയുടെ നമ്പര്‍ നോക്കി പോലിസിലെങ്ങാനും വിളിച്ചു പറഞ്ഞിട്ടുണ്ടെങ്കില്‍.....ഓര്‍ക്കാന്‍ കൂടി വയ്യ ..മൊബൈല്‍ ബെല്ലടിക്ക്മ്പോ എന്റെ ചങ്കിടിക്കുവാ... പോലീസ് ആണോ വിളിക്കുന്നത്‌ ....??